Ասպիրանտուրա (դոկտորանտուրա)
Յուրաքանչյուր ուսումնական տարվա սկզբից առնվազն 6 ամից առաջ նախարարությունը շահագրգիռ նախարարություններից և կազմակերպություններից իր սահմանված կարգով ստացված հայտերի հիման վրա, համաձայնեցված ՀՀ ֆինանսների և էկոնոմիկայի նախարարության ու ՀՀ պաշտպանության նախարարության հետ, ՀՀ կառավարության հաստատմանն է ներկայացնում ասպիրանտուրայի տեղերի թիվն ըստ ուսուցման ձևերի և ֆինանսավորման (անվճար, վճարովի):
Առկա ուսուցմամբ ասպիրանտուրա ընդունված անձինք զինվորական ծառայությունից ստանում են տարկետում` "Զինապարտության մասին" ՀՀ օրենքին համապատասխան:
1. Ասպիրանտուրայում ուսուցումն իրականացվում է առկա և հեռակա ձևերով, անվճար և վճարովի հիմունքներով:
Առկա ձևով ուսուցման տևողությունը չի գերազանցում 3 տարին, իսկ հեռակա ձևով ուսուցման տևողությունը` 4 տարին:
2. Ասպիրանտուրա մրցութային կարգով ընդունվում են Հայաստանի Հանրապետության այն քաղաքացիները, ովքեր ստացել են մագիստրոսի կամ դիպլոմավորված մասնագետի որակավորում:
Օտարերկրյա քաղաքացիները և քաղաքացիություն չունեցող անձինք բուհերի և կազմակերպությունների ասպիրանտուրա են ընդունվում միջպետական, միջկառավարական և միջգերատեսչական պայմանագրերի կամ համաձայնագրերի հիման վրա:
Օտարերկրյա քաղաքացիները և քաղաքացիություն չունեցող անձինք կազմակերպություններիմիջև կնքված պայմանագրերի հիման վրա, ինչպես նաև սեփական նախաձեռնությամբ, ասպիրանտուրա են ընդունվում վճարովի հիմունքներով:
Նախկինում ասպիրանտուրան ավարտած կամ ասպիրանտուրայից ազատված անձինք չեն կարող պետական պատվերով կրկին ընդունվել ասպիրանտուրա:
Ասպիրանտուրայի ընդունելությունը պարտադիր զինվորական ծառայությունից տարկետման իրավունքով տեղերի համար ավարտվում է մինչև ընթացիկ տարվա հունիսի 20-ը, իսկ առանց պարտադիր զինվորական ծառայությունից տարկետման իրավունքի տեղերի համար ընդունելությունը կարող է կատարվել նաև սեպտեմբեր-հոկտեմբեր ամիսներին:
Ասպիրանտուրա ընդունվողները հանձնում են քննություններ. մասնագիտական առարկայից, օտար լեզվից (անգլերեն, ֆրանսերեն կամ գերմաներեն) և ստուգարք (ինֆորմատիկա և համակարգչից օգտվելու հիմունքներ):
Այն դիմորդները, որոնց մասնագիտական առարկաներ են անգլերենը, ֆրանսերենը կամ գերմաներենը քննություն են հանձնում մասնագիտականից տարբեր այլ օտար լեզու: Մասնագիտական առարկայի քննությունը պետք է նախորդի այլ առարկաների քննություններին:
Ասպիրանտների ընդունումը ձևակերպվում է բուհի կամ կազմակերպության ղեկավարի հրամանով:
Առկա ձևով և անվճար հիմունքներով ասպիրանտուրա ընդունվածներին տրվում է սահմանված չափի պետական կրթաթոշակ` ընդունման օրվանից:
Ասպիրանտն ուսման ընթացքում պետք է`
- հանձնի որակավորման քննություններ` բուհ-ի կողմից հաստատված կարգին համապատասխան
- ունենա բուհի կամ կազմակերպության գիտական խորհրդի կողմից հաստատված աշխատանքային պլան և առնվազն 36 ժամ մանկավարժական ծանրաբեռնվածություն
Առկա ասպիրանտուրայում ուսանելու ժամանակը մտնում է ասպիրանտների գիտամանկավարժական ստաժի մեջ:
Ասպիրանտների ընդունման օրվանից ոչ ուշ, քան 3 ամսվա ընթացքում հաստատվում են ատենախոսության թեման և գիտական ղեկավարը համաձայն բուհ-ի կողմից հաստատված կարգի:
Ասպիրանտուրա ընդունվելու համար դիմումը տրվում է բուհի կամ կազմակերպության ղեկավարի անունով համապատասխան փաստաթղթեր:
Ընդունվողն անձնագիրը և բարձրագույն կրթության դիպլոմը ներկայացնում է անձամբ: